વિશ્વભરની ટોચની કંપનીઓને આકર્ષનાર ગાંધીનગરના ગીફટ સીટીમાં દારૂબંધીમાં છૂટછાટો જાહેર કરાયાના ઘેરા પ્રત્યાઘાતો પડ્યા છે. ત્યારે સપ્તાહ પૂર્વે જ વડાપ્રધાનના હસ્તે ખુલ્લા મુકાયેલા સુરતના ડાયમંડ બૂર્સમાં પણ આ પ્રકારની છૂટછાટ આપવાની માંગ કરવામાં આવી છે.
રાજ્ય સરકારની વર્તમાન નીતિ ચાલુ રહેવાના સંજોગોમાં સ્ટેચ્યુ ઓફ યુનિટી, અભ્યારણ, રણોત્સવ જેવા સ્થાનોએ પણ ભવિષ્યમાં આ પ્રકારની છૂટછાટ મળે તેવી શક્યતાનો ઇન્કાર થતો નથી. દાયકાઓથી દારૂબંધી ધરાવતા ગુજરાતમાં રાજ્ય સરકારે ગીફટ સીટી માટે ખાસ છૂટછાટો આપવાનો નિર્ણય લીધો છે. વિશ્ર્વભરમાંથી મૂડીરોકાણ હોવાથી તથા દેશ-વિદેશના લોકો આવતા હોવાથી રેસ્ટોરામાં ડાઇન એન્ડ ડ્રીંક્સની સુવિધા આપવાનું જાહેર કર્યું છે.
સરકાર વિવિધ નિયમો-શરતો સાથેનો પરિપત્ર આવતા સપ્તાહમાં જારી કરે તેવી શક્યતા છે. ગીફટ સીટીમાં દારૂની છૂટ્ટના પ્રત્યાઘાતો વચ્ચે જ હવે ભવિષ્યમાં તબકકાવાર અન્ય પર્યટન સ્થળોએ આ જ પ્રકારે છૂટછાટો મળવાની ચર્ચા થવા લાગી છે.
ગીફટ સીટી પછી હવે સુરતના ડાયમંડ બૂર્સમાં પણ છૂટછાટ માંગવામાં આવી છે. સુરતનું ડાયમંડ બૂર્સ ગત સપ્તાહમાં જ વડાપ્રધાન મોદીના હસ્તે ખુલુ મુકાયું હતું. દુનિયાની સૌથી મોટી વ્યાપારિક ઇમારત ગણવામાં આવે છે. દુનિયાભરનું હીરાનું મથક બનશે તેમાં પણ દેશ-વિદેશમાંથી ધંધાર્થીઓ રહેવાનું સ્પષ્ટ હોવાથી દારૂબંધીમાં છૂટછાટ માંગી છે. ઔદ્યોગિક મૂડી રોકાણ ઉપરાંત પ્રવાસન ક્ષેત્ર માટે દારૂબંધી વિઘ્નરૂપ ગણવામાં આવે જ છે. ગીફટ સીટી પર તબકકાવાર ડાયમંડ બૂર્સ, સ્ટેચ્યુ ઓફ યુનિટી, રણોત્સવ જેવા સ્થળોએ પણ છૂટછાટ જાહેર થાય તો નવાઇ નહીં ગણાય તેવી ચર્ચા છે.
