દિલ્હી થયું પાણી પાણી…જ્યાં જ્યાં નજર મારી ફરે ત્યાં મળે પાણી જ પાણી…

દિલ્હીમાં ભારે વરસાદને કારણે પાણી ભરાઈ જવાની સ્થિતિ છે. ગઈ રાતથી દિલ્હી અને NCR શહેરોમાં ચાલુ રહેલા મુશળધાર વરસાદને કારણે રાષ્ટ્રીય રાજધાનીમાં તમામ પ્રકારના વાહનવ્યવહારને અસર થઈ છે. DMRC એ પણ માહિતી આપી છે કે, ભારે વરસાદને કારણે યશોભૂમિ દ્વારકા સેક્ટર-25 મેટ્રો સ્ટેશન પર પ્રવેશ અને બહાર નીકળવાનું બંધ છે. દિલ્હી એરોસિટી મેટ્રો સ્ટેશનથી ટર્મિનલ 1-IGI એરપોર્ટ સુધીની શટલ સેવા સ્થગિત કરવામાં આવી છે. અન્ય તમામ લાઈનો પર સામાન્ય સેવા ચાલુ રહે છે.

દિલ્હી મેટ્રો રેલ કોર્પોરેશને યશોભૂમિ દ્વારકા સેક્ટર 25 મેટ્રો સ્ટેશન પર એન્ટ્રી અને એક્ઝિટ બંધ કરી દીધી છે. આ સિવાય દિલ્હી મેટ્રોના ઘણા સ્ટેશનો પર પાણી ભરાઈ જવાથી લોકોને મેટ્રો સ્ટેશનમાં પ્રવેશવામાં અને બહાર નીકળવામાં મુશ્કેલીનો સામનો કરવો પડી રહ્યો છે. દિલ્હી મેટ્રોએ વરસાદને કારણે IGI એરપોર્ટ ટર્મિનલ 1 (દિલ્હી એરોસિટી) પર તેની શટલ સેવા સ્થગિત કરી દીધી છે.

આ ઉપરાંત મુશળધાર વરસાદને કારણે પાણી ભરાવાને કારણે પ્રગતિ મેદાન ટનલ બંધ કરવામાં આવી હતી. દિલ્હી ટ્રાફિક પોલીસે દિલ્હી મેરઠ હાઈવે, ધૌલા કુઆન ફ્લાયઓવર નજીક નારાયણ-મોતી બાગ રોડ, આઝાદ માર્કેટ અંડરપાસ પર વીર બંદા બૈરાગી માર્ગ, તિલક બ્રિજ, અરબિંદો માર્ગ, અનુવ્રત માર્ગ અને એઈમ્સ તરફ જતા માર્ગો પર વૈકલ્પિક માર્ગો લેવાની સલાહ આપી છે. દરમિયાન, દ્વારકા એક્સપ્રેસ વેથી પોલીસ સ્ટેશન સેક્ટર 23, દ્વારકા તરફના કેરેજવે પર ઝાડ પડતાં સર્વિસ રોડ પર ટ્રાફિકને અસર થઈ છે.