ચાલો યોગ કરીએઃ આંતરરાષ્ટ્રીય યોગ દિવસ-2024માં 23 કરોડથી વધુ લોકો ભાગ લેશે….

વિશ્વ યોગ દિવસને ધ્યાનમાં રાખીને, માહિતી અને પ્રસારણ મંત્રાલય યોગાભ્યાસના ફાયદાઓ વિશે જાગૃતિ લાવવા માટે વિવિધ કાર્યક્રમોનું આયોજન કરવા જઈ રહ્યું છે. માહિતી અને પ્રસારણ સચિવ સંજય જાજુ અને આયુષ સચિવ રાજેશ કોટેચાએ આજે શુક્રવારે નવી દિલ્હીમાં આંતરરાષ્ટ્રીય યોગ દિવસ 2024 ની તૈયારીઓની સમીક્ષા કરી. યોગ અભ્યાસ કાર્યક્રમો જાહેર સેવા પ્રસારણકર્તા પ્રસાર ભારતી, દૂરદર્શન અને આકાશવાણી નેટવર્ક દ્વારા પ્રસારિત કરવામાં આવશે.

માહિતી મંત્રાલયે માહિતી આપી હતી કે દૂરદર્શન વિશેષ લાઇવ મોર્નિંગ શો તેમજ યોગ નિષ્ણાતો સાથેના કાર્યક્રમો અને ઇન્ટરવ્યુનું પ્રસારણ કરશે. આકાશવાણી, મોરારજી દેસાઈ નેશનલ ઈન્સ્ટિટ્યૂટ ઓફ યોગા સાથે મળીને લોકોના સર્વગ્રાહી સ્વાસ્થ્ય માટે યોગને જીવનશૈલી તરીકે પ્રોત્સાહિત કરવા કાર્યક્રમોનું પ્રસારણ કરશે.

આયુષ મંત્રાલયે વિશેષ રીતે યોગ ગીત પણ તૈયાર કર્યું છે જે તમામ મીડિયા પ્લેટફોર્મ પર પણ શેર કરવામાં આવશે. માહિતી અને પ્રસારણ મંત્રાલયે જણાવ્યું હતું કે, આંતરરાષ્ટ્રીય યોગ દિવસ ખાનગી મીડિયા સંસ્થાઓને મીડિયા સન્માન સાથે પ્રોત્સાહિત કરવાની પહેલ ચાલુ રાખશે. મંત્રાલયે યોગના સંદેશાને ફેલાવવામાં પ્રિન્ટ, ટીવી અને રેડિયોમાં મીડિયા હાઉસ અને કંપનીઓના યોગદાનને માન્યતા આપવા માટે ગયા વર્ષે આંતરરાષ્ટ્રીય યોગ દિવસ મીડિયા પુરસ્કારોની શરૂઆત કરી હતી.

‘હર આંગન યોગ’ પહેલ સાથે લગભગ બે લાખ સ્થળોએ યોગ શિબિરોનું આયોજન છે.હર આંગણ યોગ પહેલ હેઠળ, ગ્રામીણ સ્તરે પંચાયતો, આંગણવાડી કેન્દ્રો અને શાળાઓમાં લગભગ બે લાખ સ્થળોએ યોગ સત્રોનું આયોજન કરવામાં આવશે. મંત્રાલયે કહ્યું કે આ વખતે આંતરરાષ્ટ્રીય યોગ દિવસ-2024માં 23 કરોડથી વધુ લોકો ભાગ લે તેવી અપેક્ષા છે. ઉલ્લેખનીય છે કે વિશ્વ યોગ દિવસ દર વર્ષે 21મી જૂને સમગ્ર વિશ્વમાં ઉજવવામાં આવે છે.