વડાપ્રધાન નરેન્દ્ર મોદીએ ગુજરાતના દ્વારકામાં દરિયામાં ઊંડા ઊતરીને ડૂબી ગયેલી દ્વારકા નગરીમાં પ્રાર્થના કરી હતી. તેમણે કહ્યું કે, “આ અનુભવે મને ભારતના આધ્યાત્મિક અને ઐતિહાસિક મૂળ સાથે એક દુર્લભ અને ઊંડો સંબંધ રજૂ કર્યો.” પીએમ મોદીએ પાણીની અંદરના શહેર દ્વારકાના દર્શન કર્યા.
તેઓ ભગવાન કૃષ્ણને અર્પણ કરવા માટે મોરનાં પીંછાઓ સાથે સમુદ્રમાં લઈ ગયા હતા. પીએમ મોદીએ એક્સ પર એક પોસ્ટમાં લખ્યું કે, “ડૂબી ગયેલી દ્વારકા નગરીમાં પ્રાર્થના કરવી એ ખૂબ જ દિવ્ય અનુભવ હતો. હું આધ્યાત્મિક વૈભવ અને શાશ્વત ભક્તિના પ્રાચીન યુગ સાથે જોડાયેલ અનુભવું છું. ભગવાન શ્રી કૃષ્ણ આપણા સૌનું ભલું કરે.”
પીએમ મોદીએ લખ્યું કે, “હું ભગવાન શ્રી કૃષ્ણના કાર્યસ્થળ દ્વારકાધામને આદરપૂર્વક નમન કરું છું. દેવભૂમિ દ્વારકામાં ભગવાન શ્રીકૃષ્ણ દ્વારકાધીશના રૂપમાં નિવાસ કરે છે. અહીં જે કંઈ થાય છે તે દ્વારકાધીશની ઈચ્છા પ્રમાણે જ થાય છે. મેં દરિયામાં ઊંડે જઈને પ્રાચીન દ્વારકા જોયું. દરિયામાં ડૂબી ગયેલી દ્વારકા વિશે પુરાતત્વ નિષ્ણાતોએ ઘણું લખ્યું છે. એવું કહેવાય છે કે ભગવાન વિશ્વકર્માએ સ્વયં આ દ્વારકા શહેરનું નિર્માણ કર્યું હતું. આજે હું ખૂબ જ ખુશ છું, હું ખૂબ જ લાગણીશીલ છું. જે સપનું મેં દાયકાઓથી સેવ્યું હતું તે આજે એ પવિત્ર ભૂમિને સ્પર્શીને પૂર્ણ થયું… તમે કલ્પના કરી શકો છો કે હું અંદર કેટલો આનંદ અનુભવી રહ્યો છું.”
આજે વહેલી સવારે વડાપ્રધાન મોદીએ બેટ દ્વારકા ખાતે મંદિરની મુલાકાત લીધી હતી. અહીં દર્શન કર્યા બાદ તેમણે ઓખાથી બેટ દ્વારકા ટાપુને જોડતા 2.32 કિલોમીટર લાંબા દરિયાઈ પુલ સુદર્શન સેતુનું ઉદ્ઘાટન કર્યું હતું. આ દેશનો સૌથી લાંબો કેબલ બ્રિજ છે, જેનો શિલાન્યાસ પીએમ મોદીએ 2017માં કર્યો હતો. 900 કરોડથી વધુના ખર્ચે આ પૂલ તૈયાર કરવામાં આવ્યો છે.
