જી.એમ.ઇ.આર.એસ. મેડિકલ કોલેજ ખાતે નવા એમ.આર.આઇ મશીનનું લોકાર્પણ…..

સાબરકાંઠા જિલ્લા મથક હિંમતનગર ખાતે આવેલ જીએમઇઆરએસ મેડિકલ કોલેજ- સિવિલ હોસ્પિટલ સાબરકાંઠા તેમજ આસપાસના જિલ્લાઓના દર્દીઓ માટે જીવાદોરી સમાન બની રહી છે.

અત્યાધુનિક મશીનરીથી સુસજજ એવી મેડિકલ કોલેજ ખાતે  સાંસદ શ્રી દિપસિંહ રાઠોડના હસ્તે નવા એમઆરઆઇ મશીનનો લોકાર્પણ કાર્યક્રમ યોજાયો હતો.

સાંસદ  દિપસિંહ રાઠોડે આ પ્રસંગે જણાવ્યું હતું કે, હિંમતનગર મેડિકલ કોલેજ દર્દીઓ માટે ખૂબ જ ઉપયોગી સાબિત થઈ રહી છે. ત્યારે મેડિકલ કોલેજ ખાતે નવીન એમઆરઆઇ મશીન થકી અનેક જરૂરિયાતમંદ દર્દીઓને એમ આર આઈ માટે હજારો રૂપિયાનો ખર્ચ બહાર કરવો પડશે નહીં. સીટી સ્કેન અને એમ આર આઈની સુવિધા  મેડિકલ કોલેજ ખાતે થવાથી  ગરીબ દર્દીઓને અહીં તહીં ભટકવું પડશે નહીં.

આ પ્રસંગે ધારાસભ્ય  વી.ડી. ઝાલાએ પ્રાસંગિક પ્રવચનમાં જણાવ્યું હતું કે, મેડિકલ કોલેજની સુવિધામાં વધારો થવાથી અનેક દર્દીઓને ચોક્કસ લાભ થશે. તેમણે ડોક્ટરોને દર્દીઓને પરિજન સમજી સેવા કરવા જણાવ્યું હતું.

આ પ્રસંગે જિલ્લા પંચાયત પ્રમુખ શ્રીમતી ભારતીબેન પટેલ, તાલુકા પંચાયત પ્રમુખ શ્રીમતી ભૂમિકાબેન પટેલ, જિલ્લા કલેકટર  નૈમેષ દવે, સી.ડી.એમ.ઓ.  બળદેવભાઈ પટેલ, મેડિકલ કોલેજના ડીન, અગ્રણી શ્રી સિદ્ધાર્થ પટેલ,  વિજય પંડ્યા મેડિકલ કોલેજના ડોક્ટરો અને સ્ટાફ ઉપસ્થિત રહ્યા હતા.